Fòmasyon KEP a: KVNER denonse kèk detraktè e mande gouvènman fè atansyon
Konfederasyon Vodou Nasyonal Entènasyonal Revolisyone ak Demanbre Anpi Vodou voye yon lèt tou louvri jou ki te 3 jiyè 2024 la bay premye minis Garry Conille ak manm Konsèy Prezidansyèl yo. Nan lèt sila a, manm KVNER ak Demanbre Anpi Vodou yo pwofite atire atansyon gouvènman an sou ansanm sektè ki gen pou voye moun reprezante yo nan Konsèy Elektoral Pwovizwa ki pral monte a.
Tou 2 enstans sa yo leve vwa yo byen wo pou yo montre dezakò yo ak tout demach ki pa klè, ki gen fòs kote, pandan y ap denonse KNVA ak Wayòm Vodou ki pase tout tan yo ap souse sou rejim PHTK yo.
Yo raple KNVA ak tout Wayòm Vodou te prezan sou rejim Martelly a, yo te la sou Privert, Jovenel Moïse ak Ariel Henry. Pandan tout tan sa yo se 2 gwoup sa yo ki te toujou konn voye reprezantan yo nan Konsèy Elektoral la pandan yo pat janm panse ak rès òganizasyon ki fè pati sektè vodou a.
KVNER rele chalbare dèyè yo tou paske yo pat janm pran pozisyon pou popilasyon an nan tout moman difisil yo y ap travèse anba men gang yo men jodi a, yo deja ap planifye pou pase pa anba, pou voye reprezantan yo nan Konsèy Elektoral ki pral gen pou mete sou pye a.
Nan sans sa a, nan lèt sa a ki pote siyati Francis Willem, Faustin Stephen ak Edzer Jacques, yo mande fòk gen non reprezantan pa yo tou sou tab diskisyon yo panda yo di yo pa voye pyès lòt sektè deside nan non yo.
Konfederasyon Vodou Nasyonal Entènasyonal Revolisyone ak Demanbre Anpi Vodou yo Konsèy Prezidansyèl la ak tout gouvènman Garry Conille an pou yo pa pran nan entimidasyon sektè sa yo ki toujou vle aprè yo, se yo ankò pou l ye.
Redaksyon