Pozisyon sou evolisyon ki gen nan konjonkti a
Konbit Òganizasyon Politik, Sendikal ak Popilè yo ap suiv ak anpil enterè dènye evolisyon konjonkti a. Depi enperyalis meriken fin voye mèsenè vin ranfòse kan mafya yo nan peyi a, nou konstate zak vyolans gang yo ranfòse. Yo kraze prizon, boule komisarya, masakre pèp la epi fè anpil lòt dega ankò. Se nan kontèks sa a enperyalis meriken tou pwofite kenbe ansyen premye minis maryonèt Ariel Henry ki t ap travay pou li depi plis pase 30 mwa Nan tèt peyi a. Sa ki bay enpresyon gen yon planifikasyon enperalis la fè ak mèsenè yo nan tèt kole ak gang yo, pou kenbe Ariel Henry a nan kanpe lwen paske yo pa bezwen li ankò.
Pandan mèsenè yo nan tèt kole ak kan anti nasyonal yo ap kraze brize, KARIKOM te kontinye ap jwe wòl medyatè bò kote aktè politik yo pou jwenn yon solisyon nan kriz k ap brase bil peyi a. Se nan kad sa KARIKOM ki gen dèyè do li enperyalis meriken ak kanadyen vin jwenn yon antant ak aktè Ayisyen yo pou mete yon konsèy Prezidansyèl 7 manm plis 2 obsevatè nan tèt Leta a. Diskisyon pou mete kanpe konsey tranzisyon ki fèt ak tout kalte aktè ni moun onet kredib nan sosyete a ak ni sila yo ki patisipe danmble nan kreye kawo a, nan masakre pèp la, piye lajan peyi a.
Sa ki pi grav la, enperyalis la ak KARIKOM poze kondisyon pou yon moun manm konsèy prezidansyèl la. Daprè yo, pou yon moun fè pati konsèy la, fòk ou dakò davans ak debakman fòs okipasyon an nan peyi a. Pandan yo ekate tout lòt pwopozisyon yon seri aktè Ayisyen fè pou bay fòs lokal yo mwayen pou rezoud pwoblèm ensekirite a. Yon radiyès pèmèt, okenn patriyòt, pwogresis ak revolisyonè pa dwe aksepte.
Se pou sa, Konbit Òganizasyon Politik Sendikal ak Popilè yo ap kontinye batay pou tout ekip Montana yo voye enpozisyon sa a jete nan poubèl. Konbit la ap toujou kanpe an kwa kont tout pwojè ki vle ranfòse okipasyon peyi a, pandan l ap mande jistis ak reparasyon pou tout dega enperyalis meriken, Lafrans ak Kanada fè nan peyi a. Konbit la ap kontinye batay kont piyaj resous peyi a. Konbit la kwè li enpòtan pou aktè Ayisyen yo kontinye travay sou pi bon kondisyon pou nou rezoud pwoblèm sekirite a nan bonjan koperasyon, san dominasyon ak okipasyon etranje. Li enpòtan pou nou raple, nivo mizè, ensekirite ak gangsterizasyon ki gen nan peyi a, se rezilta plis pase 100 lane dominasyon ak okipasyon etranje. Kidonk si Okipasyon te solisyon Ayiti patap nan eta povrete al malsite l ye la.
Konbit la ap lanse yon apèl rasanbleman ak inite nan mitan tout òganizasyon ki toujou kwè nan veritab chanjman an epi ki toujou sou pozisyon pou defann dwa granmoun peyi a jan zanzet nou yo te vle sa. Pa kite kominote oksidantal la ansanm ak sila yo ki toujou osèvis yo kap fè relè pou yo nan kontinye kraze peyi a . Ann rete soude kont pwojè lanmò k ap fè tout pitit peyi a ap kouri kite l la. Ann rete soude pou konstui veritab fòs ki pou mennen ansanm ak mas Popilè yo nan wout liberasyon nasyonal, nou toujou ap batay pou li a.
Viv lit mas popilè yo !
Viv dwa grandèt majè peyi a !
Pou Konbit
Josué MÉRILIEN Jean Paul BASTIEN
Patrick JOSEPH Guy NUMA